Rajabala, June 26: West Garo Hills a·jani Rajabala Circle-oni dingtang dingtang NGO-rang jedake FKJGP, GSU, GSMC aro gipin NGO-rang baksa joloni Nokma-Sanirang, Public jinma nangrime, Rajabala jolo bijoli tik onge ongjaengani gimin aro nosto ong·gipa PWD sorokrangko namatchina dabie, Balachanda bibra-oni Chokchokia kalchakram-ona Public jinma rejomae slogan-rangko minge dabiangtokaha.
Rajabala-oni Selsella-ona dakanggipa PWD soroko taraken tarie on·china aro bijolini bidingo nengnikenganiko namatchina dabiangtokaha. NGO-rangni dilgiparang aro public jinma manderang ia rejomaniko attamchipak 1:30 P.M. bajiomangoni a·bachengtah jeon dingtang dingtang jolo songdonggipa ritcha ritcha manderang bak ra·angtokaha.
FKJGP, Rajabala Circle-ni President, Shri Samsen M Sangma ia rally-ni miksongani aro chong·mot dabianganirangko jinmana talate onangengon, pangnan bijoli chu·onggijani a·sel poraienggipa bi·sarang aro bading-chiwalgipa manderang namen neng·nikaniko mantokenga aro Rajabala-oni Selsella-ona dakanggipa rama sorokrang namjaengahani gimin jako raenggipa MP Agarwala Pvt Ltd-ko ragalsrangchina aro bijoli wataniko jako raenggipa SAI Computers Ltd-ko ragalsrangchina dabie jinmana parakangaha.
Ia tom·anio Balachanda-ni Gaonbura, Shri Bijonto Hajong aro Nokma-Sani Shri Karmel Marak-maang biaponi PWD road aro power supply-ni a·sel manderangni nenggnirangko janape sorkariko niatchina didiangaha. GSU Rajabala Circle-ni President Shri Dony Sangma aro Korakona songni Nokma-Sani Shri Ronison Sangma, uamangba sorkarina u·iatani aro kandikgipa agananirangko on·e talatangaha aro sorkari ia dabianiko knachakjaenga ongode rakbate jaku deangna mikrakataniko onataha.
Bijoli wataniko jako raskaenghipa SAI Computers Ltd-ko Khasi a·jaoni damgittam Block-rang chongmotan, Mawsynram, Ranikor aro Mawphlang oniko dengalna man·genchimode maini gimin Garo Hills a·jaoba bijoli wata tik ongjaengam baksana billrang bate bate sokoba den·galna manjaenga? Sai company baksa Gov’t maiba donue songgrikani dong·ama ine GSU-ni President singdoataha.
