Tura, August 21: Barengapara ningo donggipa Kherapara-oni Diganggre-ona PMGSY rama tarienggipani kamrangko technical aro quality-ni bidingo nirokna gita PWD Dalu Division-ni Engineer aro PWD (Roads) Tura Circle-ni Superintending Engineer aro M/S JC Infra Corporation Ltd.-ni representative-rang, aro 8-Amongpara-ni TMC Candidate Sairill D. Marak aro area-ni manderang baksa August 20 tariko joint inspectionko ka·angaha.
Ia joint inspection-ko ka·anganiara JC Infra Corporation Ltd-ni rama tarianirang namjani gimin batanggimin somoio Sairill D. Marak complaint-rangko concern officer-rangna on·aha aro ua complain-o pangchake August 20 tariko joint inspection-ko ka·angaha.
Sairill D. Marak-ni aganani gitade rama tarianirang aro drainage tarianirang namgijagipa material-chi kamrangko ka·enga ineba ua koborna uiataha. Aro ia uiatniko mansoe PWD department-ni officer -rang da·al inspection-ko ka·angaha. JC Infra Corporation Ltd.-ni contractor ia antangni namgijagipa kamrangko donuna gita tarigimin drainage aro materials-ba an·chengko inspection kana skang dismantle kasoahachim aro anchengkoba buringchi galatahachim, indake ong·genchimoba uamang an·tangni kamko donnuna man·jaha ine Marak koborna parakataha.
Uni gimin mikkangchiba complaint ka·ani jamano evidenceko gimaatna jotton ka·genchimode niam gita case-rangko kagen ine Marak mikrakataniko onange, Public-ni namgnina aro public-ni fund-ko namgija dake jakkalna man·jawa aro PMGSY rama-ni kamko approved DPR aro technical specification gita namgipa quality-o kamko ka·na nanggen ine Department-ko aro Contractor-ko aganangaha.
Aro Approved DPR gita mikkangchi tarijagenchimode anga nie dongna manjawa ine Marak janapangaha.
Indakenba ia inspection-ni technical findings/report-ko tarake on·china gitaba Sairill D. Marak department-ko didiangaha.
