Williamnagar, 25 June 2026 : East Garo Hills a·jani Williamnagar-o donggipa Samgong songo reanggipa 2025 bilsini July 18 tariko saksa me·chik bi·sako ka·saningija so·otgipani bidingo sandianiko dake, duko ga·akgipa nokdangni manderangna kakket bichalko on·ani namen jamanchakengani gimin suk ongijaniko Garo Students’ Union (GSU), Eastern Zone-ni dilgiparang parakataha.
Ia a·ael ba obosta ong·anggimin-oni bilsisa ong·na am·pilahaoba, dosi dakgipa mandeko da·alona kingkingba rim·na man·kujaenga, Magisterial ba departmental inquiry-ko dakani kamrang matchotpilahaoba, amsandiani report-o maiko sandie man·ahachim aro maiko ja·ku de·ahachim da·alona kingkingba mamingkon niksona man·kujaenga, daito gnanggipa Officer-rang case-ni bidingo mai ja·kuko de·ahachim da·alonaba ma·sina man·kujaenga ine GSU parakangaha.
Sigimin me·chik bi·sani dongrikenggipa nokdangni manderangna, da·alona kingkingba maming dakchakaniko ba compensation aro ka·dimeatani kakket sronggipa bichalko on·na man·kujaenga ineba GSU-ni dilgiparang parakataha. Dosi dakgipa mandeko indita sal ja ong·piloba rim·na man·kugijaniara, sason ka·ani ba bichal ka·ani bewalrangni bilgrianiko mesokenga aro indake ong·genchim ong·ode manderangna system-ni kosako ma·sisrete ka·dongna man·gijaniko ongkatatani gitaba ongenga aro sakgipin dosi dakgipa manderangna dosi dakana ka·donganiko on·a gita ongenga, maina dosi dakani jamano kate jokna man·ode, ian kakket bichalni niam ba dakbewalrang bilgrichongmotaniko mesokenga aro jeba jamano niam-oni kate dong·ani cholrangko ra·na man·e system ba department-o ka·dongna man·jawaha ine GSU parakangaha.
GSU, Eastern Zone, a·dokni Chief Minister Conrad K. Sangma-na aro gipin nangchapgipa department-rangna memorandum-ko on·e, ia case-ni bidingo jakgitelgipa dol ba Special Investigation Team (SIT)rangchi gital dake sandiataniko dakchina dabianiko dakangaha aro dosi dakgipa mandeko ta·rake rim·china aro Magisterial Inquiry Report-o pangchake mai action-rangko ra·ahachim uarangko parakatchina aro duko ga·akgipa nokdangna ta·rake dakchakaniko on·china dabiangaha. Uni gisepon dabianirangko ta·rake kragipa somoirango chu·sokatna jotton ka·anirang dong·jaode GSU Eastern Zone, dabianirangko rakbate dakangna gipin cholrangko ra·e ja·ku de·aniko dakangnaba dong·a ine GSU, Eastern Zone-ni President Goera R. Sangma parakataha.
#GSU #CMConrad