Tura, July 12: West Garo Hills a·ja ningo ga·akgipa Kherapara-oni Rimrangpara gita Asugre napake Diganggre-ona tarigipa PMGSY ramarang namjani a·sel Rimrangpara jolo songdonggipa manderangna namen nengnikaniko nike 8-Amongpara constituency-oni MDC susaenggipa TMC-ni candidate Pa. Sairil D. Marak PWD (roads) Barengapara Division-ni Executive Engineer-na lekka sedoataha.
Rimrangpara jolo songdonggipa manderang nangchongmotgipa kamrangna, Tura aro Dalu-ona re·rurana mongsongbate ia ramako jakkalenga aro sagipa dinggipa manderangko hospital-ona salna gitaba ia ramakon jakkalenga aro skul bi·sarang, bading chiwale chagiparang, game ge·e chagipa manderangba ia ramakon salantian rena nanga, ia ramana agre gipin ramarang dongja, uni gimin ia ramarangko ta·rake tarie ong·china Marak chittio janapataha.
Ramarangko tarienggipa M/s JC Infra corporation Ltd. kasin dugae kamko ka·an baksana kamrang namjaenga aro Amongpara-ona dakon-gipa ramao bike aro salgiparang bangen a·selrang (accident) ong·engaha aro Nachi A·du-oni ong·ongipa ba dakon-gipa ramaoba apsan daken manderang a·selrang ong·aha. Ia ramarangko re·ruraanio maming naljokani dong·ja aro tarienggipa ramarang obosta namsrang, unbaksana nirok simsakanikoba dakjaengani gimin ta·raken ramarangko niroke somoi gita name tarie on·china ineba Marak chittio janapataha.
Rimrangpara-oni Josipara-ona PMGSY ramarangko tarienggipa M/s M.P Agarwala Pvt. Ltd. ni kamrangba namjaenga baksana ka·sinenga aro nirok simsakani dong·jani a·sel ramarang namsrangjae songdonggipa manderang namen nengnikaniko chagrongna nangengani gimin PWD, Barengapara Division-ni EE -ko niroke kamrangko nambate jinmani namgnina ta·rake tarie on·china Marak mol·molataha.
Leave a Reply