Williamnagar, 2nd July, 2026: Garo Students’ Union (GSU) Eastern Zone, Williamnagar, reanggipa 2025 bilsini July 18th tariko Samgong songo saksa me·chik bi·sa kasaninggija misilpile skoo dene so·otgipani bidingo nirok sandiataniko dakchina Meghalaya State Commission for Protection of Child Rights (MSCPCR)-ni Chairman Ma Agatha K. Sangma-ko gronge agan-golpogrikanirangko dakangaha ine GSU Eastern Zone-ni President Goera R Sangma parakataha.
Ia misilbegipa a·sel ongangaoni da·o bilsisa ongna ampilengahaoba, duk man·enggipa nokdangni manderangna mamung ka·dimeatani aro k·.dongatani kattarangko sorkarini gita mamung kam ka·ani dongkujaenga aro ia a·selni bidingo chongmot ong·ani japangrangko sandianiko dakgenchim ong·oba da·alona kingking sandie man·gimin gita mamung jaku ga·aniko niksona mankujaenga ine GSU suk onggija parakataha.
GSU dolrangni parakatani gita, ia a·sel ong·ani salo chelchakgipa dolrang mamlako gisik nangge ra·genchimode haida a·sel ia misilbegipa a·sel onggnioniko chelchaksona man·aba dong·achim indiba me·chik bi·sana mamung chelchakaniko on·gija mamlako ritchenge ra·ani a·selsa obosta ong·aha ine janapangenba, Dosi dakgipa mandeko da·alona kingding rimna mankugijaniara aro indakgipa mandeni jakgitele roramaniara nokdangni manderangna jajrengchipchipe kenchakanikoba on·enga ine parakataha.
MSCPCR-ni Chairman Ma Agatha K Sangma baksa ia a·selni bidingo gronge agan-golpogrikaniko dakon ia mamlani bidingo darangba una da·alona kingking u·iata dongkujachim ine agan-janape, dingtangmancha iani bidingo nirokatani aro sandiataniko dakgen ine ku·rachakaniko onangaha ine GSU, Eastern Zoneni dilgiparang janapataha.
GSU, Eastern Zone, ia mamlani bidingo jena kingking sianggipa nogipani janggina aro duk man·enggipa nokdangni manderangna kakket bichalko on·na mankuja dipet dongtonggija sorkariko didianggen ine GSU Eastern Zoneni dilgiparang parakataha.