Jengjal, June 27: West Garo Hills a·ja ningo ga·akgipa 22 Jengjal GDC elakaoni changgnina GHADC-ni MDC-na seokako man·gipa Lt. Purno K Sangma (P.K. Sangma) June 25 tarik 2026 Bristibar pringni bako a·gilsako wate reangaha. Ua saksa GSU-ni gitcham President aro GHADC-ni gitcham Chief Executive Member (CEM)ba ong·achim.
Indake una bonkam mande rapilskaniko June 27 tarik Sukrubar salni bako Williamnagar kalchakramo ong·atangon, Jengjal joloni dingtang dingtang NGO-rang jedake GSMC, GSU, AYWO dolrang Jengjal-oni Anogre-ona Konta gni dokkanrangko chipe, dongrikenggipa nokdangni manderang baksa kalimpae, una mande rapilskaniko me·sokangskaha.
Lt. P.K Sangmani gitacham elakao dokkan pasarangkosan chipe una mande rapilskaniko dakaegija attamni somoio joloni nangrimgimin NGO-rang, jolo songdongenggiparang aro dokkan association-rang baksa candle light service-ko ong·ate, Jengjal areana, Garo Hills-na aro Jatna dingtang dingtang gadango gamchatanirangko on·gilani kattarangko dilgiparang parake, jinmaan apsan minute sana jrip jrip donge sianggipani nokdangna, madrang maharina bichakgrimaniko dakangaha.
Indake uni dilna changani aro gamchatgipa kamrangko jinmana parakangenba, Jatna a·songna uni ka·saniko skie jarike, gipinrangkoba nama gunrangko jarikchina didiani kattarangkoba jinmao aganangaha. Uni janggi tangani bonkamgipa salona kingkingba ua GSMC dolni chief adviser ong·e kamko kakuengachim ine parakataha.
