Dadenggre, 21 September 2026: West Garo Hills a·jani Dadenggre Civil Sub-Division ningo donggipa Providence Secondary school, Adinggre-o Talent Show-ko 19 tarik 2026 Sonibar salni bako ong·atgipao warachakgipa dolni dilpipa aro Songsakni MLA Dr. Mukul M. Sangma mongsonggipa sokgipa ong·e bak ra·angaha.
Mongsonggipa ong·e sokgipa Dr. Mukul M. Sangma, talent Show-ko ongatanganio chatro chatrirang, chrok su·saa, magitcham pagitchamrangni kal·susaanirang jekai chambil moa, wapong sika, jakpong pe·a, una agreba carrom, Fancy dress, puppet show, git ringsusaa aro live noksa salanirangko nike uamngni changa sapaniko nike kusi ong·beeha, maina da·ororo skul-rango magitcham pagitchamrangni kal·susaaniko nika komibeaha.
Indake Dr Sangma antangni damben salrangko gisik ra·pilenba, skang songo noko dilgiparang aro maa pa-rang kal·susaanirangoba skul-rangna agreba ong·atronganio dala chona p’lakan apsan ong·e bak ra·a aro indakgipa programme-ko ong·ataniara gimikon apsan tom·dakate kusi ong·rimnaba chol ong·a ine sangma aganangaha.
Dr Sangma programme-o jinmana aganprakengon, skigipani kamko anga kam ine aganjawa ian bi·sarangko name simsake mikangchina nama kamna tarisona nambegipa cholko on·gipa ong·a, beton-ko ra·chakgipa kam ine ra·na nang·ja aro beton man·gipa kam ineba sandigipa ong·na nangja, re·anggipa somoi skigipani skul ka·gijaniko South Garo Hills a·jao officer-na complaint ka·oba maming dakja ine songni manderang agana, uan gov’t skull-ni skigipa bangbea beton-ko mangipa ong·a nasimangni schoolni skigipa baksa tosusaode nasongo namen komia, indiba skigipanade beton bangen on·a nang·a maina skigipade guru ba dilgipasa ineba sangma aganangaha.
Providence Secondary School-ko 2014 bilsio Class Lower KG, Upper KG aro class 1 kosan kulichengenba, 2022 bilsio secondary-koba kulidapangha. Skanggipa matric porikako 2024 bilsio 10-oni saksni se·e passed ka·aha. Saksa 1st division onge Health Education subject-o letter mark-ko manaha, 2nd-o sak 3 aro 3rd-o sak3, 2025 bilsio sak 17 oni sak 17 passed ka·aha sak-11 1st division aro sak-6 2nd division, English-o sak-3, Garo sak-14 aro HPE- sak-9 letter manaha aro 2026-o sak 20-oni passed ka·aha sak-13 1st division aro sak-7 2nd division-o, English-o saksa letter, Garo-o sak-8 aro HPE-o sak-8.
Ia school-o chatro chatri sak-360 aro skigiparang sak 13 dong·a ine Providence Secondary school-ni Principal Sister Simkey G. Momin aganangaha.
Leave a Reply